2 Corinthians 6
1Hu'mamofihi le'mo bati nehana bona'i lali lenegekesa lito ma luto lu lepilata nohune. Hu'mamofihi lehe'mose'na'a molo lepalalina buto fa'menena lolo mehino. 2Hu'mau lu'ehina ka'a ya'ma ma huto ni'igo kehelilo:- Nani lenehe'mose kapo
- hokolo hu'ohuna kanagu
- lenali ka keheli'ohunamo ni'ibe.
- To lenubuto bise kanalo
- lenele'mo bati hu'ohunamo ni'ibe.
- Ya lu'ehibe.
3Lali ana huto bona'magitoga foya lilata nohuta'mu kosele ka li lalabe luto yamofihi mono kaga behelefe limi lalabe luto ya mehu'ohune. 4Lali Hu'mamofihi foyalo bo'a nohutagihe yamofihi hapa'a li huto huto ma luto molo lito bulata nohune. Keke'i luse'namofihi gupisa'alo nohutoti to ufeha'a hiti nasanamofihi gupisalo minoto to i'i o'enamofihi gupilo mino'ohuta yatai ketipanamofihi komopa'agu nominone. 5Segi osatu ite i kehe li keheli nehago naga nonugu mino'ohuta kalana'i melete lehalune'mu nehago minolata hu'ohutamo ni'ibe. Keke'i luse foya lito nohuto, lubu'i mekose ho tiloto nohuto nose'nati menose minomo buto nohutogo Hu'mamofihi foyalo bo'a nohutamofihi hapa'a ya'ma huto huto hulata nohibe. 6Ya huto nominotaya komopati besa lago nohuto kehelise'na minoto komopati fulu higo minoto lalalutigihi noenehe'motogo Sikalafu'i hiti minoto komopati bati huto epilata nohune. 7Lusiga luto ka legeya'a noluto Hu'mamofihi amuya lito minolata nohune. Lamana'a ni'igo nominoto'a nohutogo yanamofihi gimi mage'a helegu'a lolo huto lito nominone. 8Ligiti le'mo ho tise'namu to lubuya huse'namofihi folagaha'agu minolata nohune. To lofokehi lilatana to libe pigi bibe hilata nehana yamofihi folaganugu nohutogo Hu'mamofihi foyalo bo'a nohutamofihi hapa'a ya huto huto hulata nohibe. Fagalo bo yabe lite neli letago faga meluse minolata nohune. 9Hapati'mu sa sa nehanaya Hu'mau hapati keheli su ho'ehinabe. To fililatanalo lebato'isi ni'igo fililune'mu nohutaya fa'mene lubu hiti minolata nohune. To lahago filito bu'ohutamagita fa'menena lolo menohune. 10To keke'i luse'namofihi gupisalo nohuto legelo biba biba huto nominone. Salafa'amofita sibigopa bona'i asagatoga mono'mofihi fe'noha'a hiti enele'mo lolo hulata nohune. Lumuhi menina'a nohutogo komopatimofihi fe'noha'a bai toto ni'igo nominone.
11Oho, Koliti bona'ise. Komopa'ni ya'ma lenalitoga babu luto ni'ibe. To labaguti lusiga luto lu nolepune. 12Laliti yamofihi komopati amuya moloto lenele'mo hetofa hulata nohune. Lenali lenemehi limilata nehana yamofihi nesi'asi ni'ibe. 13Lenali kumu kehelugo pa'ni pana'ni lolo nehago kaga'ni ya'ma lu nolepube. Mone kegi'a beleha'aga pa sete ana hite lenemeha'a nanitoga melenogo mineno.
Hu'mamofihi mono noha'a nohune
14Hu'mamofihi ka mekehelise bona'magitoga bite mino hepite koguna lolo mehilo. Lamana'a hiti to laga mehinana hiti etali hena hite i hepite menala'ibe? Ya'ma i mehepila'ina'mu yabe. To fana mehena hiti metepuna hiti moneko kumu minala'ifiye? O'e, ya huto meni'ibe. 15To Kilisitohi ai kala bo'a Sata hiti etali hena hite komopa'atiti hena hite le'mo hepila'ibe? Ya hila'ina meni'ibe. To Hu'mamofihi ka kehelito nominota bona'a lali hiti to ai ka'a menekehelina bona'i enali hiti hena huto koguna huto minalune? Ya huto meni'ibe. 16To Hu'mau hiti lugefa nasana hiti moneko nonugu minala'ifiye? Ya huto meni'ibe. Nekehelifihe? Hu'ma amuya moloto minoba minoba bomofihi noha'a lali ya'ma nohune. Ya hu'ehina'mu Hu'mau ma luto lu'ehinamo ni'ibe:- Nani bona'nimagihi komopa'anigu
- minoto lito minoloto'ni
- enali folagaha'anigu humofa'na hilube.
- To nani enali sipi bo'ani lolo huto
- minalube.
- To enali nani yagapana'ni lolo hite
- minalabe.
- Nanitoga mekehelise neminana'a
- he'mi epelete foto'i minalo.
- To nani lu laga hu'ehinamofihi
- bati mehina nasanalo
- ya'ma li mekehelilo.
- Ya hilenogo nani'ni kaba hu lepoloto
- lenele'mo hetofa hilube'mu hube.
Copyright information for
BEF